Aqeedah ka matlab hai dil se kisi baat ko sach maanna, us par yaqeen rakhna, aur apne amal se iska izhar karna. Islami tanazur mein, aqeedah iman ka bunyadi hissa hai, jisme Allah ki Wahdaniyat, Anbiya ki sadaqat, aakhirat ki jaza o saza, farishton ki mojoodgi, Allah ki kitabon, aur taqdeer par iman shamil hai. Aqeedah hamari zindagi ka rehnuma usool hai jo hamein sahi raste par qaim rakhta hai. Misal: Ek talib-e-ilm jo imtihaan ki tayari kar raha ho, agar uska aqeedah hai ke Allah madad karne wala hai to woh dil se dua karega aur apni puri mehnat karega. Is aqeeday se us ka aitmaad aur sukoon barhta hai.
Islam
ke Buniyadi Aqaaid: Tauheed, Risaalat, Aakhirat
1) Tauheed: Allah ki Wahdaniyat
Ta’reef: Allah apni zaat, sifaat aur ikhtiyaaraat
mein akela hai — sari ibaadat sirf usi ke liye.
Teen pehlu — ek nazar mein:
Tauheed ur-Ruboobiyyah: Allah hi Khaliq, Malik, aur
nizaam chalane wala hai.
Roz marra misal: Nokri, karobaar, tanqah — sab asbaab
hain; asal rizq dene wala Allah. Tanqah kam aaye to ghabrahat ke bajaye dua +
behtar koshish.
Tauheed ul-Asmaa wa Sifaat: Allah ke naam aur sifaat
kaamil, makhlooq jese nahi.
Amli misal: Allah “Rahmaan” hai; hum bande apne
ikhtiyar mein reham dil banen — ghar ke mulazim/humsaye se narmi.
Tauheed ul-Ibaadah (Al-Uloohiyyah): Ibaadat sirf
Allah ki — namaz, dua, nazar, sajda, khauf/umeed sab usi se.
Amli misal: Mushkil aaye to foran Namaz e Haajat +
dua; ghair shar’i tohammaat (nuksan se bachne ke “tone”, “khaas rang/din”) se
bachen.
“Qul huwa Allahu
ahad. Allahus-samad. Lam yalid wa lam yoolad. Wa lam yakun lahu kufuwan ahad.”
(Ikhlaas 1–4)
Mini Checklist (Tauheed):
Aaj maine…
(i) Shukar kaha? (ii) Dua maangi? (iii) Kisi ghair shar’i
sahare se bacha?
2) Risaalat: Nabiyon ki Rehnumai
Ta’reef: Allah ne Anbiya bheje jo uska paighaam
pohchayein. Muhammad ﷺ aakhri Nabi hain;
unki Sunnat mukammal raah e zindagi hai.
Kyun zaroori?
Sahi/ghalat ki pehchan: Nabiyon ne miyaar diya.
Misal: Khareed o farokht mein dhoka nahi — Nabi ﷺ ne sachai aur poora tolne ki taleem di.
Qur’an ki amali tashreeh: Sunnat = Qur’an par chalne
ka tareeqa.
Misal: Ghar mein salaam, muskurahat, baron ka ehtram
— yehi Nabawi akhlaq.
Khatam un-Nabiyeen: Nabi ﷺ
ke baad koi Nabi nahi; hidayat ab Qur’an + Sunnat se.
Misal: Mazhabi maamla aaye to “Daleel kya hai?” —
Sunnat dekho, tab amal karo.
“…wa laakin Rasool
Allah wa Khatam an-Nabiyeen…” (Ahzaab 40)
Sunnat in 24 ghante:
Subah miswaak/duayein, khane se pehle/baad ki
duayein, waliden/shohar/bachon se narmi, waqt ki pabandi, jhoot/gheebat se
bachaav.
3) Aakhirat: Hisaab, Jaza o Saza
Ta’reef: Marne ke baad dobara zinda hona, aamaal ka
hisaab hona, phir Jannat/Jahannum.
Kyun maanna zaroori?
Zindagi ka maqsad seedha hota hai: Neki ko tarjih
milti hai.
Misal: Tanhaai mein bhi amanat daari — kyunki Allah
dekh raha hai.
Insaaf e kaamil par yaqeen: Duniya ki na-insaafiyan
aakhirat mein poori ho jaati hain — dil mutmain rehta hai.
Neki ki targhib: Chhote chhote kaam bhi bhaari ban
jaate hain.
Misal: Line mein apni baari, rasta na rokna, kooda
dabbe mein dalna — sab likha ja raha hai.
“Wa wuffiyat kullu
nafsin ma ‘amilat wa huwa a’lamu bima yaf’aloon.” (Zumar 70)
Aaj ka “Aakhirat Check”:
(i) Ek ghalti par foran tauba, (ii) Kisi ko faida,
(iii) Sone se pehle dil ki safai.
Aqaaid ko zindagi se jorna — Aasaan Misalen:
Faislay mein Tauheed: Nokri badalni hai? Pehle
istikhara + mashwara + halal/haram check.
Ghar mein Risaalat: Bachon ke saath wada poora karna
— Nabi ﷺ ka tareeqa.
Market mein Aakhirat: Naap tol poora; agar cheez mein
nuqs hai to pehle batana — hisaab dena hai.